പരിസ്ഥിതിയെയും  പെൺമക്കളെയും  സർവോപരി നമ്മുടെ ഭൂമിയെയും സംരക്ഷിക്കാനുള്ള  ഒരു ഗ്രാമത്തിന്റെ ദൗത്യം.

      പെൺകുഞ്ഞിന്റെ ജനനം ശാപമായി കരുതിയിരുന്ന ഒരു ഗ്രാമം ഇന്ന് പെൺകുട്ടികളെ സ്വാഗതം ചെയ്യുക മാത്രമല്ല അവരുടെ ജനനം ആഘോഷിക്കുകയും ചെയ്യുന്നു. പെൺമക്കളെയും മരങ്ങളെയും ഗ്രാമങ്ങളിലെ പൊതുഭൂമികളെയും സംരക്ഷിക്കുക എന്നത് എല്ലാ ഗ്രാമനേതാക്കളുടെയും ലക്ഷ്യമായിരിക്കണം എന്ന് വിശ്വസിക്കുന്ന ഒരു മനുഷ്യന്റെ തീരുമാനത്തിന്റെ ഫലമാണ് ആ മാറ്റങ്ങളെല്ലാം.

      എവിടെയാണ് ഈ ഗ്രാമം എന്നാണോ നിങ്ങൾ അന്വേഷിക്കുന്നത് ? നമ്മുടെ ഇന്ത്യയിൽ തന്നെയാണ് ലോകശ്രദ്ധ പിടിച്ചുപറ്റിയ ആ ഗ്രാമം. മരങ്ങൾ പുത്രന്മാരും സഹോദരന്മാരുമായ പിപ്ലാന്ത്രി. രാജസ്ഥാനിലെ രാജ്സമന്ദ് ജില്ലയിലെ ഒരു ചെറിയ ഗ്രാമമാണ് പിപ്ലാന്ത്രി. ഇക്കോ-ഫെമിനിസത്തിന്റെ വിജയകരമായ പ്രയോഗത്തിന് കഴിഞ്ഞ ദശകത്തിൽ ഇത് ആഗോള ശ്രദ്ധ നേടിയിട്ടുണ്ട്. ഈ ഗ്രാമത്തിന്  അനുഗൃഹീതവും അഭൂതപൂർവവുമായ ഈ മാറ്റം കൊണ്ട് വന്നയാൾ മറ്റാരുമല്ല ഗ്രാമത്തിന്റെ മുൻമേധാവിയും രാജ്യത്തെ അറിയപ്പെടുന്ന ഇക്കോ ഫെമിനിസത്തിന്റെ സമരസേനാനിയും സർവോപരി നല്ലൊരു മനുഷ്യനുമായ ശ്യാം സുന്ദർ പലിവാൾ.

      വരണ്ടതും തരിശായതുമായ ഭൂപ്രകൃതികളാൽ ചുറ്റപ്പെട്ട ഒരു ഹരിത ദ്വീപ് പോലെയാണ് ഈ ഗ്രാമം. രാജ്യത്തിന്റെ ഒരു വരണ്ട മേഖലയിൽ സ്ഥിതി ചെയ്യുന്ന ഈ ഗ്രാമത്തിൽ ഇന്ന് വിവിധ ഇനങ്ങളിലും പ്രായത്തിലുമുള്ള മരങ്ങൾ നിറഞ്ഞ പച്ചപ്പ് നിറഞ്ഞ ചുറ്റുപാടുകളാണുള്ളത്. ഒരുകാലത്ത് 330 അടിയിലേറെ താഴ്ചയുണ്ടായിരുന്ന ഭൂഗർഭജലവിതാനം ഇപ്പോൾ ഉയർന്ന് 40 അടി മാത്രം താഴ്ചയിലാണ് ഉള്ളത്. ഒരു കാലത്ത് രാജസ്ഥാനിലെ ഒരു അറിയപ്പെടാത്ത ഗ്രാമമായിരുന്ന പിപ്ലാന്ത്രി ഇപ്പോൾ ദേശീയ അന്തർദേശീയ അംഗീകാരങ്ങൾ നേടിയ അറിയപ്പെടുന്ന ഒരു മാതൃകാ ഗ്രാമമാണ്.

    എന്താണീ മാറ്റത്തിനു കാരണം ?

    2005ൽ പിപ്ലാന്ത്രി വില്ലേജ് കൗൺസിലിന്റെ സർപഞ്ചായി (തലവൻ) പലിവാൾ തിരഞ്ഞെടുക്കപ്പെട്ടപ്പോൾ ഈ പ്രദേശം മുഴുവൻ തുടർച്ചയായ ഏഴ് വർഷമായി വരൾച്ച അനുഭവിക്കുകയായിരുന്നു.  ഖനനവും ഖനന മാലിന്യങ്ങൾ സമീപപ്രദേശങ്ങളിൽ തള്ളുന്നതും പാരിസ്ഥിതിക പ്രശ്‌നങ്ങൾ വർദ്ധിപ്പിച്ചിരുന്നു.  പലിവാൾ ഗ്രാമത്തിൽ അഭികാമ്യമായ മാറ്റങ്ങൾ കൊണ്ടുവരാൻ തീരുമാനിച്ചു. മഴവെള്ളം സംഭരിക്കുന്നതിനായി മണ്ണുകൊണ്ടുള്ള ചെക്ക് ഡാമുകൾ, അണക്കട്ട്, മറ്റ് ജലസംഭരണ ഘടനകൾ എന്നിവയുടെ നിർമ്മാണം അദ്ദേഹം ആരംഭിച്ചു. നിർഭാഗ്യവശാൽ, 2006 ൽ, പലിവാളിന്റെ 14 വയസ്സുള്ള മകൾ നിർജ്ജലീകരണം മൂലം മരിച്ചു. അന്ത്യകർമങ്ങളും ചടങ്ങുകളും നടത്തിയ ശേഷം ഗ്രാമത്തിലെ മേച്ചിൽപുറത്ത് മകളുടെ സ്മരണയ്ക്കായി അദ്ദേഹം വൃക്ഷത്തൈ നട്ടുപിടിപ്പിച്ചപ്പോൾ കുടുംബാംഗങ്ങളും നാട്ടുകാരും കണ്ണീരിൽ കുതിർന്നിരുന്നു.

പെൺകുട്ടികൾക്കായുള്ള മരങ്ങൾ

      “എല്ലാ ഗ്രാമവാസികളുടെയും ഈ കണ്ണുനീർ കണ്ടപ്പോൾ എനിക്ക് തോന്നി, എന്റെ മകളുടെ ഓർമ്മയ്ക്കായി ഒരു തൈ നട്ടുപിടിപ്പിച്ചാൽ അത്തരം വികാരങ്ങൾ ഉണർത്താനും എല്ലാ ഗ്രാമവാസികളെയും ഒരുമിച്ച് കൊണ്ടുവരാനും കഴിയുമെങ്കിൽ, ഗ്രാമത്തിലെ ഓരോ പെൺകുഞ്ഞുങ്ങളും ജനിച്ചതിന് ശേഷം എന്തുകൊണ്ട് മരങ്ങൾ നട്ടുപിടിപ്പിച്ചുകൂടാ,” പാലിവാൾ അനുസ്മരിച്ചു.

      അദ്ദേഹം തന്റെ കുടുംബവുമായും ഗ്രാമസഭയുമായും ആശയം ചർച്ച ചെയ്തു. എല്ലാവരും ആശയം അംഗീകരിച്ചു. ഓരോ പെൺകുഞ്ഞിന്റെയും ജനനത്തിനു ശേഷം മൂന്ന് തൈകൾ – നവജാതശിശുക്കളുടെയും അമ്മയുടെയും അച്ഛന്റെയും പേരിൽ – നടാൻ തീരുമാനിച്ചു. പിന്നീട്, അത് 111 ആയി (1+1+1), മൂന്ന് പ്രധാന പങ്കാളികളുടെ ഒത്തുചേരലിനെ പ്രതിനിധീകരിക്കുന്നു, കൂടാതെ ഒരു ശുഭ സംഖ്യയും.

കരുതലിന്റെ കരങ്ങൾ

     മരങ്ങൾ നട്ടുപിടിപ്പിച്ചതുകൊണ്ടു മാത്രം പെൺകുട്ടികളുടെ ശാക്തീകരണത്തിനുള്ള തന്റെ ശ്രമം പലിവാൾ നിർത്തിയില്ല, പെൺകുട്ടിക്ക് സാമ്പത്തിക സഹായം നൽകുന്ന ഒരു പദ്ധതിക്ക് അദ്ദേഹം തുടക്കമിട്ടു. പദ്ധതി പ്രകാരം, സമൂഹത്തിൽ നിന്ന് 21,000 രൂപയും മാതാപിതാക്കളിൽ നിന്ന് 10,000 രൂപയും ശേഖരിക്കുകയും ശേഖരിച്ച തുക പ്രാദേശിക ബാങ്കിലോ പോസ്റ്റ് ഓഫീസിലോ നിക്ഷേപിക്കുകയും ചെയ്യും. പെൺകുട്ടിക്ക് 18 വയസ്സ് തികയുമ്പോൾ മാത്രമേ തുക പിൻവലിക്കാനാകൂ. നട്ടുപിടിപ്പിച്ച മരങ്ങൾ പരിപാലിക്കുമെന്നും മകളെ പഠിപ്പിക്കുമെന്നും മാതാപിതാക്കളും വാഗ്ദാനം ചെയ്യുന്നു.

അവരുടെ സഹോദരങ്ങൾക്കൊപ്പമുള്ള ആഘോഷം

     ജനിച്ചപ്പോൾ നട്ടുപിടിപ്പിച്ച മരങ്ങളെ തങ്ങളുടെ സഹോദരങ്ങളെപ്പോലെയാണ് പെൺകുട്ടികൾ പരിഗണിക്കുന്നത്. എല്ലാ വർഷവും, രക്ഷാബന്ധന് രണ്ട് ദിവസം മുമ്പ് – പെൺകുട്ടികൾ സഹോദരങ്ങളെ ബഹുമാനിക്കുന്ന ഉത്സവം – പെൺകുട്ടികൾ മരങ്ങളിൽ രക്ഷാസൂത്രമോ രാഖിയോ കെട്ടി അവരെ സംരക്ഷിക്കുമെന്ന് പ്രതിജ്ഞ ചെയ്യുന്നു.

അനന്തരഫലം

   ഗ്രാമവാസികൾ ഇതിനകം 4 ലക്ഷത്തോളം വിവിധയിനം തൈകൾ നട്ടുപിടിപ്പിച്ചു. ചിതൽ ശല്യത്തിൽ നിന്ന് മരങ്ങളെ രക്ഷിക്കാൻ ഗ്രാമവാസികൾ ചുറ്റും കറ്റാർ വാഴ ചെടികൾ നട്ടുപിടിപ്പിച്ചു. ഇപ്പോൾ ഈ മരങ്ങളും കറ്റാർ വാഴയും നിരവധി ഗ്രാമീണരുടെ ഉപജീവനമാർഗമാണ്.

അംഗീകാരം

പിപ്ലാന്ത്രിയെ ഇന്ത്യാ ഗവൺമെന്റ് മാതൃകാപരമായ ഗ്രാമപഞ്ചായത്തായി അംഗീകരിച്ചിട്ടുണ്ട്. ലോകമെമ്പാടുമുള്ള ആളുകൾ വികസനത്തിന്റെ പിപ്ലാന്ത്രി മാതൃക പഠിക്കാൻ ഈ ഗ്രാമം സന്ദർശിക്കുന്നു. കോൻ ബനേഗാ ക്രോർപതി എന്ന ടിവി ഷോയിൽ നടൻ അമിതാഭ് ബച്ചനുമായി സ്‌ക്രീൻ സ്പേസ് പങ്കിടുന്നതിനു പുറമേ, പാലിവാൾ തന്റെ മാതൃകാപരമായ നേട്ടങ്ങൾക്ക് നിരവധി അവാർഡുകളും ബഹുമതികളും നേടിയിട്ടുണ്ട്. 2021 ജനുവരി 26 ന് സർക്കാർ പ്രഖ്യാപിച്ച പരമോന്നത സിവിലിയൻ അവാർഡുകളിലൊന്നായ പത്മശ്രീയാണ് അവയിൽ ഏറ്റവും അഭിമാനകരമായത്. പിപ്ലാന്ത്രിയെ സ്വയം സുസ്ഥിരവും രാസരഹിതവുമാക്കാനും കന്നുകാലികളുടെ മെച്ചപ്പെട്ട ഇനങ്ങളെ പരിചയപ്പെടുത്താനും തന്റെ ഗ്രാമത്തിന് ചുറ്റും കൂടുതൽ ഫലവൃക്ഷങ്ങൾ നട്ടുപിടിപ്പിക്കാനും പലിവാൾ ആഗ്രഹിക്കുന്നു.

ഈ ഭൂഗോളത്തിലെ .001% ആളുകളെങ്കിലും പലിവാളിനെപ്പോലെ ഉന്നതമായ നിലയിൽ  ചിന്തിച്ചാൽ, ലോകത്തിലെ സ്ത്രീകൾക്ക് അഭിമാനകരമായ ജീവിതം നയിക്കാനാകും, അതുപോലെ ആഗോളതാപനത്തിന്റെയും കാലാവസ്ഥാ വ്യതിയാനത്തിന്റെയും അനന്തരഫലങ്ങളിൽ നിന്ന് ഭൂമി ഒരു മിനിമം നിലയിലെങ്കിലും സംരക്ഷിക്കപ്പെടും.

Video courtesy – History TV 18